A familia de Rosalía de Castro segue a ter moito que contar. O Servizo de Publicacións e Intercambio Científico da Universidade de Santiago de Compostela (USC) acaba de editar Cartas de Alejandra Murguía de Castro a Ángela Santamarina (1916-1925), un epistolario que inaugura a nova Biblioteca da Cátedra Rosalía de Castro.

Alejandra era a primoxénita do matrimonio formado por Rosalía de Castro e Manuel Murguía, e as cartas reunidas neste volume foron escritas nun período fascinante da historia contemporánea: dende os preliminares da Revolución Rusa ata a ditadura de Primo de Rivera. Son, segundo a presentación da obra, un testemuño moi elocuente de como pervivía no primeiro cuarto do século XX un legado familiar construído no XIX, e que aínda hoxe nos interpela.

A edición literaria corre a cargo de Dolores Vilavedra, e o limiar leva a sinatura de Xesús Alonso Montero, dúas voces de referencia no estudo da literatura galega. O volume, publicado en Santiago de Compostela en 2026, ten 143 páxinas e un prezo de 12 euros en formato papel. Ademais, a libraría dixital da USC ofrece a posibilidade de lelo en liña e de descargalo, así que está ao alcance de calquera persoa interesada en achegarse á intimidade da familia Murguía-Castro.

Para quen estuda ou vive en Compostela, esta publicación é unha boa excusa para mergullarse na figura de Rosalía a través da mirada dunha das persoas que mellor a coñeceu. Se che interesa a cultura galega e a historia da cidade, é unha lectura que paga a pena engadir á lista.

Ficha do libro

  • Título: Cartas de Alejandra Murguía de Castro a Ángela Santamarina (1916-1925)
  • Limiar: Xesús Alonso Montero
  • Edición literaria: Dolores Vilavedra
  • Serie: Biblioteca da Cátedra Rosalía de Castro, 1
  • Editorial: Servizo de Publicacións e Intercambio Científico da USC
  • Ano e lugar: Santiago de Compostela, 2026
  • ISBN: 9791388118333
  • Prezo (papel): 12 €