PAU 2026: todo o que tes que saber sobre a convocatoria ordinaria de xuño

A Proba de Acceso á Universidade (PAU) 2026 está á volta da esquina. Se este ano te examinas, este é o teu resumo completo con datas, horarios, normas de acceso e todo o que non podes esquecer o día do exame.

A PAU 2026 conta con convocatoria ordinaria en xuño e convocatoria extraordinaria en xullo. A organización corre a cargo da Comisión Interuniversitaria de Galicia (CIUG) e lembra: a convocatoria extraordinaria de xullo é a última oportunidade de presentarse á PAU 2026 para acceder ao Sistema Universitario Galego (SUG).

Horario oficial da convocatoria ordinaria

Martes, 2 de xuño

Mañá

• 9:00–10:00 h → Presentación (alumnado NEAE: 9:00–9:30 h)
• 10:00–11:30 h → Lingua Castelá e Literatura II
• 12:00–13:30 h → Historia de España / Historia da Filosofía

Tarde

• 16:00–17:30 h → Xeoloxía e Ciencias Ambientais / Matemáticas Aplicadas ás CC. Sociais II / Técnicas de Expresión Gráfico-Plástica / Movementos Culturais e Artísticos
• 18:00–19:30 h → Debuxo Técnico II / Segunda Lingua Estranxeira (Alemán, Francés, Inglés, Italiano, Portugués) / Historia da Música e da Danza

Mércores, 3 de xuño

Mañá

• 9:30–11:00 h → Primeira Lingua Estranxeira (Inglés, Francés, Alemán, Portugués, Italiano)
• 11:30–13:00 h → Bioloxía / Tecnoloxía e Enxeñaría II / Historia da Arte / Debuxo Técnico Aplicado ás AA.PP. e ao Deseño II

Tarde

• 16:00–17:30 h → Física / Empresa e Deseño de Modelos de Negocio / Grego / Fundamentos Artísticos / Coro e Técnica Vocal II
• 18:00–19:30 h → Química / Xeografía / Deseño / Literatura Dramática

Xoves, 4 de xuño

Mañá

• 9:30–11:00 h → Lingua Galega e Literatura II
• 11:30–13:00 h → Matemáticas II / Latín II / Artes Escénicas / Debuxo Artístico II / Análise Musical II / Ciencias Xerais

Que tes que levar o día do exame

Obrigatorio:

• Etiquetas adhesivas con código de barras (recíbelas na comisión)
• DNI, pasaporte ou permiso de residencia (tamén se admite o DNI dixital coa App MiDNI)
• Resgardo de matrícula e xustificante de pagamento
• Bolígrafo ou pluma de tinta indeleble azul ou negra

Permitido:

• Xel desinfectante e panos de usar-tirar
• Auga ou refresco en botella transparente sen etiquetado

Materiais específicos segundo materia:

• Latín II → dicionario latín/español ou galego con apéndice gramatical (sen páxinas de contidos literarios)
• Grego II → dicionario grego/español ou galego con apéndice gramatical
• Debuxo, deseño e artes → material indicado nas directrices dos Grupos de Traballo
• Matemáticas II, Matemáticas CC. Sociais, Física, Química, Empresa e Ciencias Xerais → calculadora sen programación nin capacidade gráfica

Está prohibido acceder á aula con teléfono móbil, reloxo intelixente ou calquera dispositivo electrónico activado. O incumprimento pode supor a expulsión da aula, un 0 no exame ou a anulación total da proba.

Normas importantes o día do exame

• O estudantado debe estar presente ás 9:00 h o primeiro día (martes 2 de xuño) para a presentación.
• Unha vez repartidos os exames, non se pode abandonar a aula nos primeiros 30 minutos.
• Os exames deben ser anónimos: sen sinaturas, cores nin marcas identificativas.
• Cada exame ten catro preguntas obrigatorias. Se respondes máis das permitidas, só se corrixirán as primeiras.

Despois de realizar a prematrícula, podes revisar os teus datos na aplicación NERTA. Se detectas algún erro, diríxete ao teu centro de Bacharelato antes das 12:00 h do 22 de maio (convocatoria ordinaria). Non se admiten cambios despois desta data.

O alumnado con adaptacións específicas realizará a proba na comisión delegada que lle foi notificada, con todos os medios necesarios (ampliacións de tempo, lecturas comprensivas, apoios técnicos, etc.). Se precisas un acompañante, comunícao á CIUG con anterioridade.