Chegou a recta final do curso e con ela o momento de sacarlle o máximo partido ás bibliotecas da Universidade de Santiago de Compostela. O período extraordinario de apertura das bibliotecas do segundo semestre esténdese ata o vindeiro 30 de xuño, e a USC oferta máis de 3.400 prazas distribuídas en distintos puntos de servizo nos campus de Santiago e Lugo, con amplos horarios que chegan incluso ás 24 horas nalgúns espazos.

Biblioteca Concepción Arenal e Biblioteca Intercentros (Lugo)

A Biblioteca Concepción Arenal en Santiago e a Biblioteca Intercentros en Lugo abrirán de 8:30 a 0:00 horas ata o 5 de xuño, e de 9:00 a 22:00 horas do 6 ao 30 de xuño.

Sala de Lectura de Dereito

A Sala de Lectura de Dereito abre do 28 de abril ao 11 de maio en horario de 8:30 a 3:00 horas; do 12 de maio ao 1 de xuño permanece aberta as 24 horas; e do 2 ao 8 de xuño o horario é de 8:30 a 3:00 horas.

Outras bibliotecas

A Facultade de Ciencias Económicas e Empresariais abrirá entre as 8:30 e as 22:00 horas do 28 de abril ao 1 de xuño. A biblioteca de Bioloxía amplía o seu horario de luns a venres entre o 1 de maio e o 1 de xuño, tamén de 8:30 a 22:00 horas, con apertura en fin de semana e festivos do 17 de maio ao 1 de xuño. A Escola Técnica Superior de Enxeñaría abrirá de luns a venres entre o 12 de maio e o 1 de xuño, no mesmo horario.

Comproba os postos libres en tempo real

Podes consultar a ocupación das bibliotecas en tempo real desde a web da BUSC, no apartado «Postos de lectura«, ou a través da app oficial da USC en «Postos na BUSC». O servizo está dispoñible entre semana de 9:00 a 21:00 e os fins de semana e festivos de 9:00 a 19:00. Tamén podes seguir a conta de BlueSky @buschorarios.bsky.social para estar ao día.

Desde a Residencia Universitaria La Rosaleda animámosvos a aproveitar estes horarios e a planificar ben o estudo nestas semanas clave. Moito ánimo na recta final! 💪